شد في الأصل:حوار المارطو مع الفنان الجزايري الموسطاش

السلام عليكم، خونا الموسطاش! تقدر تعرّفنا بروحك؟ (وين زدت، أما جيل زدت فيه)

 تحياتنا، نشكر المارطو على هاد المبادرة و الخدمة ألي راكو تديروها . الموسطاش زايد في رويبة عام 1979 و تربيت و كبرت في بومرداس الي يسموها مدينة الفكر و الإبداع (خاطر كاين بزاف المتقفين ، دكاترة و إطارات) عشت التمانينات و قت الزرابط و البواس و جومارو و جنڨر حتى زدمت الپارابول و عشت التسعينات و انا صغير و مكاش الي ما تأترش ، انا ضغير و نشوف الغول فالنشرة و عندي فاميلتي توفاو في ديك المرحلة ( الله يرحم و الله يسترنا من ديك الموصيبة ) درت الدراسات العليا ديالي في پوليتكينيك تاع الحراش و ديت ديپلوم في هندسة الكهرباء و مبعد خدمت في شركة تخدم المواقع الإلكترونية و مع الوقت رحت الكوكب الألوان و ديزان و اول تجربة ليا في هاد الدومان كان السيت تاع حمود بوعلام و كنت مدير فني فالپروجي و مع الموازي تكونت في الــماناجمنت في معهد إي-أس-جي-پي. في الميدان الفني مارست المسرح مع الفرقة تاع المسرح الجديد لمدينة يسر ( الي نحييهم ) و مارست الفنون القتالي وينغتسون كونغ فو في بومرداس و نحيي ڨاع الخاوة .

تقدر تعرّفنا بالفن ديالك؟ كيفاش تسميه؟ وقتاش بديت الخدمة الفنية ديالك؟

الفن تاع الموسطاش نصنفو في الـپوپ أرت أي بمعنا فن شعبي (بدزيرية) . و فن يستعمل مودات الشعبية و هدا الفن قريب في قواعد ديالو القواعد الإتصال في الجانب الإشهاري و على هدي الي سهالتلي باش نجوز للپوب أرت . بديت الفن هدا في 2008 كان پوپ ارت على شكل خط باليد  وكنت نحكم كلمة شعبية و نزوّقها ( شكوپي، طاڨ على من طاڨ ، دز معاهم... ) ، عندي صاحبي نزيم بايا تاع المنشار ( و نحيوه تان ) سمّاه ستيل هدا كاليغرافيكاتير (خط اليد+ كاريكاتير)  و مع الوقت حبست النوع هدا خاطر ليا من الجانب البصري ماكانش عندو شكل جزايري وجمالي (إيستيتيك) زيد قريب ڨاع هاد الخدمة كانت تعبر على شكوة ولا حاجة سلبيية و داك الوقت كنت عييت مالشكوة ، كنت كتر حاب نجيب حلول و نأتر على روحي و المحيط ديالي إجابيا . وفي 2013 ظهرت الظاهرة عقاقير تاع الشيخ وليد بوشوشي ( تحياتنا حضرات ) الي هو بلاك اول پوپ ارت جزايري من الناحية الـجمالية .( أستعمل مادة أمزيغية و إفريقية و إسلامية ) تاترت بزاف البخدمة تاعو ، و الموسطاش هو  بين تأترات جزايرية و أجنبية بتوشية تاع الموسطاش ميكس.

شفنا بلي كاين جملة تحطّها بزّاف في الخدمة ديالك وتأكّد عليها هي: شد في الأصل.وعلاش شد في الأصل؟ تقدر تحكي لنا على رايك في الفكرة اللي راك حاب توصل لها كي استعملت هذه الجملة؟

 ليا الشجرة تاع الزيتون عمرها لا تولي نخلة و النخلة عمرها لا تولي شجرة تاع زيتون. و نخلة كي تجيبها للبيئة تاع شجرة الزيتون هيا تتأقلم للبيئة و ماشي البيئة ألي تتأقلم ليها . عندنا إرت تاريخي عجب ، في الميدان الفكري شمال إفريقيا

كشاب جزايري عشت التأثرات الأجنبية السائدة في الجزاير من الأوربي/القاوري ( الفرنسي بصفة خاصة ) ، المصري ، السعودي و زيد  كاين حوايج في المحلي مخلّطين بالراداءة ، الخرطي و المصالح الشخصية … و حنا على العكس تاع جناس الأوخرين الي عرفو يتأثرو إيجابيا من التيارات الثقافية الأجنبيية حنا خسارة بزاف التيارات هبطونا اكثر من الّي جابوتا لنا الخير كيما العصبية والبعثية والوهابية السعودية والغزو الفكري تاع فرسنا والماريكان ….

حنا عندنا إرث ثقافي عجب يقولوا عندو 12000 عام ساهم في ڨاع الحضارات و عندنا تمازيغت (الأمازيغية) لغة من أقدم اللغات الي عرفها البنادم و هدا ڨاع يقدر يعاونا باش نديرو ساس و نكونو شخصية تغزي المستقبل ، خاطر نتفاهمو الصح هو المستقبل الجناس لوخرين راهم يخمّوا كيفاش يخدموا صواريخ و يسكنوا في كوكب مارس و الشي اللي يأسف حنا رانا حاصلين في سنة شيعة و لا مشاكل عندها قرون و لا المصاص الدماء في غرداية مع المرقي الشنفرة … ( هذه كارثة! ) وشنو دوك نشكر مثقفين الي راهم يحاولوا يأثروا المجتمع بطريقة ايجابيية و يرفعوا المستوى وهذه حاجة تفرّح . نمد كمثال المبادرة تاع « نبني » و كاين « ملتقى الأنوار للفكر الحر » و « المارطو »، بيان سور.

واشنو هو رايك في الفن اليوم؟ يعني كيفاش لازم يكون الفن في رايك؟ وواشنو هي المهمّة تاع الفنان في المجتمع اللي زاد فيه واللي يعيش في وسطو؟

 فالفن تبانلي كاين جيل جديد خشين اللي عاونه الوسائل الحديتة تاع التواصل باش يتعلم ، ينشط و يمد كلمت . هدا الوسائل دارو نهضة ( إيدا نقدرو نقولو ) في ڨاع الميادين الفنية، و خاصة التصوير، عجب كيفاش زادت المادة الصورية الجزايرية في 5 سنين و بمستوى راقي . و ظهرو أسامي جدد من collectif 220 مع يوسف كراش و العصابة ديالو ، و كاين نجيب coup d’oeil و إسلام مول الزنقة … و الظاهرة « يوميات مول الجلابة » حتى في ميدان الستريت آرت عجب كاين شبيبة تاقبة الباش كيما 213w من الپانشو ، سنيك ، سيرداس , سپلينتر ، عبد الغاني ، بلدى، vato , bms … دايرين عصابة خشينة ، و في الفنون التشكيلية كاين الغني عن التعريف « الرجل الأصفر » ألي بلاك من أدهش الفنانين و أشجعهم في المواضيع اللي يعالجهم ( الطابوهات التلاتة كيما يقولو « الجنس،الدين و السياسة  » ) . وبلا ما ننسا العبقري و الشيخ ديالي وليد بوشوشي « عقاقير » اللي ماكاش موسطاش بلا بيه و ليا هو أوندي وارولد الجزايري . و حتى فالموسيقى كاين جيل جديد فالتكملة الكاتب أمازيغ ألي هو الأب الروحي ديالهم كيما فريكلان ( و نحييهم ڨاع بالجملة ) و كاين « الع »ُ مع التجرب تاع mix تاع ترات بصبغة سياسية معارضة و التجارب ديالو مع عمي مجيد و تطوير اللباس الموسيقي للشعر الملحون . شبيبة حية

احكي لنا شوية على التجربة تاعك في المعارض Les expositions ؟ كيفاش جازت؟ كيفاش كان الكونطكت مع الناس الحاضرين؟

الحاجة اللولى هي ڨاع التجارب جاو من المواطنين، (من مبادرات خاصة ) كالـ collectif istikhb’art او kef noun gallery او club d’étudiants تاع جامعة بومرداس و تاع المدرسة المتعددة التقنيات للهندسة . و هدي ڨاع حاجة تفرح خاطر راهي تجي مبادرات من الشباب بنفسها بلا ما تتكل عل الدولة . و كمتال تان المستوى الراقي الـ picturie général 3 فالمضمون الفني ( دارو فريق تاع البارصة جابو ڨاع الخشان ) و في التنظيم و هدي ڨاع مبادرة شباب . زيد على هدي les espaces privé الي راهم غير الزيدو على المتال la baignoire ، l’atelier kefnoun gallery ezzou’art gallery …. و هدي حاجة فور. تان جربت نحط الإنتاج ديالي فالقهوة تاع الحومة « قهوة المادور » و كان تجاوب عجب مع التاوعنا و حاجة تفرح، دار حالة الپوستار تاع معطوب و تاع الشاب حسني الله يرحمهم .

شفنا بلي انت كفنان تخدم بزّاف على الدارجة تاعنا، الدزيرية. وعلاش في رايك الدارجة لازم تبان في الفن تاعنا؟

الدزيرية هي اللغة الأم ديالنا مع التمازيغت/الأمازيغية، زدت فيها و كيما تعرف اللغة جزء هام فالهوية ديالنا . و يتافقو الناس بلي الجزايرية هي اللغة الي يستعملها قريب ڨاع الجزايريين و بالعكس على تمازغت الي عندها مناظلين ديالها و ناس ضحاو عليها باش السلطة ترسمها ، الجزايرية ماعندهاش نفس الحظ . رغم ان هاد اللغة عندها ارت ادبي جميل الي نشوفوه في قصايد الملحون و الأندلسي . و نشكر عمي مجيد ( الشيخ عبد المجيد أعراب ) الي فطني في هاد الشي و فالقصيد تاع عمي مجيد نشوفو مدى رقي هاد اللغة من الناحية اللغوية و الفكرية تاع محتواها . تبانلي عندنا كنز اللي ما راناش فايقين بيه و على هدي نتمنا يكون كيما تمازيغت الي اليوم نشوفو فيه غزارة كبيرة في الانتاج الأدبي كيف كيف بالدزيرية . و مع العُ و عمي مجيد نحاولو نوصلو الأرت هدا الجيال تاع دك بطريقة ولباس عصري. و من الناحية التقنية كايما قتلك مقبل الپوپ أرت فالقواعد ديالو يشبه قواعد الإشهار . واش هي اللغة الي يفهموها ڨاع و توصل الــميساج (الرسالة) تم تم. و على هدي نستعمل الدزيرية من الناحية التقنية . و عندي انتاج سميتو « انا نهدر الجزايرية » و راني نوجد  » انا نكتب بالجزايرية  » ولا « انا نكتب كيما نخمم ، بالجزايرية  » و « جزايرية لغة رسمية » و زيد فالزمان جدودنا كانو يكتبو بالجزايرية على متال الرسائل تاع الأمير عبد القادر ڨاع بالدزيرية . و نتمنا الأدباء ديالنا يحاولو يكتبو و بديرو تجارب في هدي الجهة و على حسابي الجيل هدا واجد لهاد التحديات و التجارب .