عقلية بن مهيدي

دموع الدم تسيل من العيون
على الكارثة، المصيبة ذي
كي رجعوا نعال بني صهيون
يتالبوا في أحفاد سي بن مهيدي

معاذ الله من هاذ الزمان
لي حتى كي الحق يكون فيه باين
و تقول على العميل سلمان
بلي كلب ترامب و خاين
القزم يتعالى على الجبال
حاب يوضع على فمنا كمامة
باش يغطي الشمس بالغربال

والعقاب يرجع روحو حمامة

بصح وين عقلك يتودر
كي تشوف كلب الأمريكان
في بلادك يتفرعن و يأمر
تقول هو قائد الأركان

قالك لازم درك نعرف
شكون هاذ الرجال الأحرار
لي بطرف قماش يرفرف
بينو فيا العيب و العار

و تشوف السلاطات المحلية
في بلاد المليون و نصف شهيد
بالسمع و الطاعة الكلية
تستجيب لهم كالعبيد

قالك نديرو تحقيق باش يبان
شكون أصحاب الفكرة لي أهانتهم
و زادوا طلعولهم الشان
و طلبوا السماح من حضرتهم

« سمحولنا على هاذ الشبان
هما بالنسبة ليهم عادي
كي قالوا الحق في وجه الطغيان
ورثوا عقلية بن مهيدي »

كتب النص: جواد رستم تواتي