شمعات في الظلمة

1

كان الليل قد هبط.  كنا أنا وعليلو واثنان من أولاد حيه نتحدث، على مرتفعات حومتهم سرفانتس ، ببلوزداد. كنا واقفين تحت عمود إنارة عمومية مشعول. لم يكن كل الشارع منيرا، فبعض الأطراف في الحومة كانت مظلمة لأن بعض الأعمدة الكهربائية معطّلة. كان في فم كل واحد منا سيجارة ينفث دخانها في هواء هذه الليلة الباردة .

• خويا، بلا ما نكثروا الهدرة. نعرفوا البلاد مليح. هاد السيستام اللي راهو حاكم البلاد لازم يتبدّل. ما نقدروش نزيدو نستناو. تقبونا يا خو! بلادنا كلاوها، الرشوة، السريقة، الشوماج، الحقرة عيناني، الحرقة، التعمار، بناولنا غير لحباس في عوض يخدموا لنا السبيطارات، يسقموا الصحة، يفروا لنا هاد الأزمة تاع السكنة، يبنوا لنا أوزينات. كارثة! يضربوا جيب الزوالي وهوما راهم غير يزيدوا يترفهوا من السريقة.
• والله يا خو، المجاهدين ما حاربوش فرنسا باش نولّو هكدا، في استعمار جديد. كمية حاكمين البلاد وعايشين، فاريينها، ولاماجوريتي تاع الشعب يتخبّط في الميزيرية. ركبوا لنا القنطة يا خو.
• راك تشوف خويا نبيل: شوف حومتنا سرفنتس، راهي تريب بالشوية. شحال من دار، من باطيمة رابت ورحلوا مواليها. راك في  بلوزداد المجاهدة. التاريخ ينطق هنا خو. حومة محمد بلوزداد وعيسات إيدير وروشاي بوعلام وأحمد بودة. بالصح الحركى الجدد ما دابيهم يمحيوا التاريخ تاع بلادنا
•  باينة، الحركي يبقى حركي. يعبد البراني ويخدم عليه ويتقب بلادو. تغيضك عمرك تشوف الحومة هكدا، خاوتي. الفساد داير كراعو في بلادنا. . الحالة راهي مخروبة في كل بلاص، في لوسندي (حسين داي) غلقوا لوزينات، ريبوا ديور، بناو ليزوتيل، رحلوا السكان. بالصح راهو جاي نهار الحركى الجدد ان شاء الله. شحال وهوما يسرقوا ويخربوا في البلاد. يجي نهارهم يخلصوا قاع كما راهم، بإذن الله. رانا فايقين دوكا. خلاص وقت الغفلة
•  واحد ما يحشيها لنا دوك. ما كانش الخامسة خو! ميردا. راهم شافونا خرجنا غاشي الجمعة اللي فاتت وقلنا لهم ما كانش الخامسة
• ميردا على الخامسة! حنا أسيابي من بكري خويا نبيل.
• لازم خاوتي! احنا تاني أسيابي. ميردا على كامل هاد السيستام وعلى الخامسة
• ميردا على الحركى الجدد وعلى الخامسة. ما راناش رايحين نسكتو وما يقدروش يسكتونا. رانا عقابهم.

عليلو يعمل في حانوت كانكيري، ملك لعائلته.واحد من أولاد حومته يعمل ميكانيكي في ورشة ميكانيك بالحي والثاني يشتغل بوكالة لموبيليس. وأنا أعمل بستيديو للتصوير، عند خالي. كنا ثلاثة شبابيست ونهديست واحد (الراوي) مجتمعين.

2

جالس على السرير، في غرفتي، في حي الباطيمات الجدد، في القبة، غير بعيد عن كارتي شينوا. حيّنا بني في ثمانينات القرن الماضي ولكن لا يزال معروفا باسم الباطيمات الجدد (العمارات الجديدة)

خطرت ببالي الفكرة التالية فكتبتها على كناش:

كل شيء فوق هذه الأرض يتبدل أو قابل للتغير. لا شيء يستقر على حاله. لا توجد حالة جامدة إلى الأبد. البقاء لله!

لقد زال نظام الاستعباد التقليدي وزالت الإقطاعية وزال الاستعمار القديم وحل مكانه الاستعمار الجديد. لقد زال حكم الآغوات ثم القياد والباشغوات واليوم نرى آغوات وباشغوات وقيادا جدد. انهزمت فرنسا في حرب الفيتنام التحررية وفي حرب التحرير الوطنية، هي التي كانت تعتقد أنها ستخلد في أرضنا وأن امبراطوريتها لا تتزعزع أبدا.

سلطة الجشع والحقرة لا يدومان إلى الأبد. المقاومة وُجدت دائما. لكل فرعون موسى. في الحركة بركة، كما يقول مَثَلُنا الشعبي.

آجلا أم عاجلا، ينقلب المظلومون ومعذّبو الأرض على ظالمهيم، على آكلي حقهم، على الحقّارين. إنها حتمية تاريخية. هكذا تدور عجلة التاريخ.

كتب النص: محمد وليد قرين